Escoda Day maselselebraran...
Dingras Ilocos Norte.
Madama iti preparasyon iti Escoda Day kas pananglaguip iti isasangay ti banuar nga ilokana a ni Josefa Llanes Escoda.
Naiyanak ni Josefa Llanes y Madamba iti ili ti Dingras Ilocos Norte idi Septyembre 20, 1898 ken isuna iti nangilaban iti adbokasya daguiti babae iti kapanawenna iti maikadua a gubat ti lubong (World War II). Isuna iti nangbukel iti Girl Scouts of the Philippines.
Ni Josefa iti inauna kadaguiti pito nga agkakabsat nga anak daydi Mercedes Madamba ken ni Gabriel Llanes. Nagbalin kas valedictorian isuna iti grade school ken salutatorian met iti high school iti Ilocos Norte. Nagturpos iti kolehiyo sadiay Philippine Normal School sadiay Metro Manila iti kinamestra, ken nagun-odna iti pammadayaw kas with honors idi tawen 1919.
Kabayatan iti panagtrabahona kas mangisursuro, nagun-odna iti high school teachers certificate iti University of the Philippines idi tawen 1922. Kalpasanna, nagbalin isuna kas social worker iti Philippine Chapter of the American Red Cross, nu sadino a nagun-odnamet iti scholarship ti Red Cross nga impaay ti Estados Unidos kenkuana, ken nakaturpos iti masteral degree iti Sociology.
Kabayatan iti papanna iti Estados Unidos sadiay Women's International League for Peace idi 1925, ket ditoyna a nakita ken naam-ammo ni Antonio Escoda, maysa a reporter iti Philippine Press Bureau ket nagkatuloyanda a kas agasawa. Naadaanda iti dua nga annak, isuda Maria Theresa ken Antonio. Gapo iti kinagaggetna nga nagbasa nagun-odpay ni Josefa iti Master's Degree'na iti Social Work sadiay Columbia University idi tawen 1925.
Idi tiempo ti maikadua a gubat ti sangalubongan, sinakop daguiti pwersa ti Hapon iti Pilipinas. Ditoy a naarestar ti asawana a ni Antonio idi Hunyo tawen 1944. Naglabas iti nasurok dua a bulan, naarestar met ni Josefa idi Agusto 27. Naibalod isuna sadiay Fort Santiago. Napapatay met ni Antonio Escoda idi tawen 1944 kaduana ni General Vicente Lim.
Naudi a nakita ni Josefa idi Enero 6, tawen 1945. Maipagarop nga natay isuna iti pasdek iti Far Eastern University nga inakoparan daguiti Hapon. Patien ti kaaduan a naitabon isuna sadiay La Loma Cemetery wenu itan a maaw-awagan iti Manila Chinese Cemetery, nu sadino a nagbalin daytoy a pagpumponan daguiti napapatay a narway a Filipino.
